"صفر"

مفيش ولا حد خلاني رقم  واحد
مفيش ولا مرة كنت أنا الأصلح
بعيد يجرح قريب يجرح .. و أوقول عدّي هتتصلح
مفيش ولا مرة كمِّل دوري علي المسرح

دايمًا دوري متاخد ..و دايمًا لازم اتعاند
و أحارب عشان أفضل عشان اتبقي للآخر
دايمًا أنا الشاهدة .. انا الساندة مع إني ف الأصل مش مسنودة
دايمًا بكون موجودة .. و كتير بكون موعودة بكل اللي مش هييجي
دايمًا ف نص الطريق بتساب و أعافر أكمل طريق غيري
دايمًا مفيش أسباب  غير إن ببساطة عمر ما حد خلاني رقم واحد

مع إني بستجدع و بستحمل .. و شيّالة و انا أصلاً للوحدة ميّالة
لكن دايمًا فضول الخلق بيجيبهم و بيسيبهم..
لحد ما يعرفوا إنّي .. انا و سنّي ..بُعاد عن بعض
و لحد ما يعرفوا إنّي مفيش ولا حد خلانّي رقم واحد
فيزوّدوا الآلم واحد..إيه يعني مجاتش من واحد

و برغم غباوتهم و برغم قساوتهم لكنّي مش بخلص
يمكن كتير ينقص .. من ضحكتي شوية .. و يقولوا مش هي
لكنّي برجع أقوم ..باين كدة اتعودت أو غصب عنّي زهدت
ف إني مرة أكون و لو صدفة رقم واحد