أنتى مش راجل

أنتى اللى نزلتى من بيتك عشان تجيبى حق بلدك ؟
أنتى اللى نزلتى عشان أخوكى اللى مات ؟
أنتى اللى قويتى قلبك عشان "مصر " ؟
أنتى مش راجل .. أنتى أحسن من الراجل مية مرة .. لأن كلمة "راجل" مبقتش معيار الأخلاق و الأدب والجدعنه .. ليه ؟ عشان اللى إغتصبك راجل

إهداء لياسمين البرماوى و ناقصات العقل والدين وكيدهن والأم الثكلى و المعشوقة والمنهوبة والضالة والتائهة وبراءة العذراء
إلى البكر المغتصبة

أنتى طاهرة زى أرضك .. أنتى وردة وهتكوا عرضك
أنتى لسة زى ما أنتى لا و أحسن ماتخفيش
أنتى اللى لسة بتهتفى ويمكن تموتى عشان نعيش
إستنيتى إيد تتمدلك وكل إيد إتمدت عليكى
عرّوا كل حتة فيكى
يمكن صحيح عرّوا جسمك .. بس جواكى ألف توب بيداريكى
سكوتك عورة متسكتيش .. ومتخافيش

متداريش ومترجعيش
أنتى مش عورة  أنتى العفة والطهارة و الثورة
 أنتى مش نص الحياة .. إنتى معناها وكلها
أنتى اللى ساكته و أنتى اللى صابرة
أنتى نون النسوة .. أنتى الكيد والعزيمة
أنتى الثورة .. وأنتى الأم العظيمة

أنتى حتشبسوت وكليوبترا و شجرة الدر
أنتى مش حاجة تدارى .. أنتى صوتك حر
أنتى نجمة فى السما بعيدة متتلمسش
أنتى فرحة العيون .. و العين الزرقا اللى بتحمى وتخوّف وتصون

أنتى النص الحلو اللى فى كل حاجة .. أنتى حلوة وهتفضلى
علّى صوتك .. هتقدرى **