يا وريدي

إكفيني شر اللي يحبس روحي فيه

و شر عشمي ف خيرهم اللي مش ليا

و شر روحي لما تتعلق ف اللي مش ليها

إكفيني شر سحبة روحي و ضيقة نفسي اللي معرفهاش غيرك

إكفيني شر حبي لما يعميني

إكفيني شر كسرة القلب 

وشر البُعد اللي روحي مش بتتحمّلهُ

إكفيني شر اللي أنا عايزاه و مش هييجي

و شر اللي هييجي و انا مش عايزاه

إكفيني شر اللي بيهدوني 

إكفيني شر زعلي اللي أكبر من كل راحة بال دوقتها

إكفيني شر وجع القلب اللي مش بينساني

إكفيني شر الدنيا لما تلهيني

إكفيني شر وحدتي اللي انا إخترتها

و شر القسوة اللي من بعد حنية

و شر الحنية لما تيجي عليا

إكفيني شر عيني لما تفضح زعلي

و شر عينهم لما تفضح كرههم

إكفيني شر الدنيا اللي مش بقبلها

و شر الشر اللي ف الدنيا

إكفيني شر شيطاني 

و شر الخوف اللي كتير بيعميني

إكفيني شر ساعة الغفلة

و شر الصدفة اللي حلفالي لسنين قدام

إكفيني شر بُعدها عنّي 

و شر زعلها منّي
و إكفيني شر الحزن اللي جالي لابس توب الفرح
و شر الفرح اللي مش ليا وقلبي هواه

إكفيني شره .. اللي مشوفتش منه غير الشر

إكفيني شر عقلي اللي مش بينام

و شر قلبي اللي مش بيطاوع

إكفيني شر الحزن علي الي مش مستاهل

و شر الزهد ف اللي مش بييجي بالساهل

إكفيني شر الأيام اللي عاندتك فيها

و قولتلي لا و قولتلك عايزة

إكفيني شر الذنب اللي واقف بيني و بينك

و شر اللي عاملين عارفينك
إكفيني شر نظرة غضب منك
و شر ساعة سهو عنك
و شر نهار غيّم عشان أنت مش راضي
و شر اللي أنا عايزاه و انت مش عايزه
و شر اللي انا لقيته و أنت مش كاتبهولي
إكفيني شر الضحكة لما تبهت
و شر روحي اللي مش عايزة تعيش ع الأرض
و شر الأرض اللي مش عايزاني أعيش فيها
إكفيني شر اللي ياخد من عمري سنين
و شر السنين اللي رايحة من عمري
إكفيني شر اللي مش فاهماه
و شر كل اللي فهمته و كان أكتر من طاقتي
إكفيني شر طاقتي اللي بتروح هدر
إكفيني شر الكلام اللي إتكتم جوايا
و إكفيني شر االلي جوايا ميعرفوش غيرك

إكفيني عنهم بيك

إكفيني عنهم بيك

إكفيني عنهم بيك

"ونحنُ أقربُ إليه من حبلِ الوريد"

من بحر لبحر

و هتفضل تهرب طول عمرك من بحر لبحر
و تخاف تنهي الجملة بنقطة و تسيب السطر
و هتفضل خايف من بكرة
و هتفضل باقي علي الذكري
و هتنسي الساعة اللي فإيدك
و إزازتك تلغي ف مواعيدك
و كأنك جاي عشان تنسي
و كانك تايه بالفطرة
و مفيش ف دماغك غير فكرة
و مفيش ف عيونك غير "هيّ"
"هيّ" دي ممكن تبقي التوهة
أو تبقي الضحكة اللي انت سارقها
أو تبقي عيونها اللي أنت ناسيها
"هيّ" دي ممكن تبقي الدنيا
اللي انت حاضنها و ماسك فيها
و هتيجي الدنيا عليك تاني
و تبص ف ساعتك تلاقيها ..من غير ولا عقرب
و هتفضل واقف تناديها
و هتفضل دايمًا متغرّب
ما هي كانت حضن و كانت بيت
بس انت باينك حالف ما يتكمل اسمها غير ب ياريت
حنيت؟ ما هم بيقولوا دوّارة
و هتفضل تايه فيها كدة و مش لاقي البرّ
و هتفضل محبوس طول عمرك بتقول انا حر
و علشان تتصدق ف بتهرب من بحر لبحر
و هتفضل عايش بسذاجة
و هيفضل قلبك تلاجة
و هتفضل تايه من غيرها
و هتفضل شايفاك ولا حاجة

الهاوية

الي الواقفون علي حافة الهاوية .. المهددون دائمًا بالسقوطِ و في أي لحظة
لا تجدهم أبدًا في المُنتصف..يختارون دائما أقصي أقاصي كل شئ
تجدهُم بجوار النوافذ يتطلعون الي الهاوية المُقبلة..
يحتسون القهوة حتي آخر رشفة .. أو ينشغلوا عنها حتي تفقد لذتها
يؤجلون كل الأمور أكبرها و أصغرها حتي آخر دقيقة
دائمًا ما ينتهون قبل قبل وقت النهاية بثوانٍ لا تُذكر
يجازفون بكل ما لديهم و كل ما ليس لديهم
دائمًا خيارهُم الأخيّر هو المجازفة .. الهاوية

يرقصون حتي الثمالة أو يتعبّدون حتي التطّهر من الثمالة
ينتصر الچين الصوفيّ فيزهدون أحيانًا في كل شئ.. 
و احيان آخري يريدون كل شئ بمعني كل شئ
غير مُبالين بكل ما يدور حولهم ولا حتي أنفُسهم ..
و إذا إهتموا لا تفوتهم تلك الثغرات التي لا يُدركها سوي مخرج مخضرم
ضحكاتهُم تدويّ عاليًا اذا ضحكوا يستحضرون بهجة الكون
و اذا تألموا حزِنوا كأُمٍ ثكلي و قلبٍ مكلوم ولو علي أتفه الأمور
يحرقون أنفسهم يجلدون ذاتهم يتخبطون بين كل شئ و نقيضه
لكن لا يختاروا الوسط أبدًا .. ليسوا في المنتصف مهما حدث

من إختاروا الإبتعاد عن دائرة الأمان.. و جدوها مملة رتيبة
هم من إختاروا الترنُح عند حافة الهاوية
إختاروا الموت مُحلقين بأثقالهم بدلاً من الموت مُثقلين بأوجاعهم
المرء خُلِق هلوعًا لا يشعرُ بالحياة إلا و هو علي الحافة
و لذلك إختاروا الحياة ..