شكراً

شكر لكل واحد فيكو

أولهم شكر للى حبيته .. شكر للى مخدتش منه و إديته

شكراً للحظة طيش واللى عدى مانسيته

شكراً للى واقفه فضهرى وشكراً للى ساندانى

شكراً لكل حاجة لقيتها وهى لسه مش لاقيانى 

شكراً للى وجعى وجعها .. شكراً للى نفسى أسمعها

شكراً للصاحبة الوفيه .. وشكر للكبرياء

شكراً للحجات اللى مش هى  .. وشكراً للى من المر داق

شكراً عشان حبيتنى وشكراً عشان عديتنى وشكراً عشان حنيت

شكراً  للصبر اللى قالك كفاية بعد ماستنيت

شكراً ع الضحكة دى اللى خطفتها والبسمة اللى رسمتها

شكراً ع النصايح حلوة .. وشكراً على كل غنوة

شكراً ياللى نسيانى وتعبانى.. و يوم ما تتجرحى فكرانى 

شكراً ع الجدعنة .. وشكراً على كل اللى إتحكى ومتنساش منه إلا انا

شكراً لكل حاجة وهمتنى .. وخليتنى أعيش وقتلتنى

شكراً لكل مكان .. وشكراً للى حب ما خان

شكراً ياللى ماسك إيدها .. شكراً ياللى لسه واعدها

شكراً يالحظة فرحة ونظرة عين 

شكراً لكل اللى اتكتب على اسم واحد مش اسمين

شكراً للحكاية اللى ناقصة سطور  .. وشكراً للى خلاكى عطشة وبور

شكراً للى ناسياها وفاكرانى ..  للى وجعاها و واجعانى

شكراً يا نسمة صيف .. شكراً يا أخف ضيف

شكراً ياللى ماشية مكملة وكسرانى 

شكراً لكل كتاب .. شكراً للى انربط مانساب

شكراً يا لحظة ضعف فسرى كتماكى .. شكراً يا كلمة خوف رفضانى ورفضاكى

شكراًً للوقت الضايع وشكراَ للى عامل صايع 
شكراً يا ناسى وجعها .. شكراً ونقولها تانى يمكن فيوم تسمعها

شكراً للى آسف جداً و إحنا مش آسفين

شكراً للى عامل فاكر و إحنا عاملين ناسيين

شكراً للى عارف فينه وشكراً للى بينى وبينه

شكراً عالسذاجة وشكراً ع الدلع

شكراً على كل حاجة و شكر كبير للى خلع

شكراً للى لاغية ضميرها وشكراً للى عاملة عبيطة

شكراً لكل شباك..  سهر مع السهرانين

شكراً للى راح هناك..  ونسى اللى مستنيين

شكراً ياللى راسمة حويطة وشكراً ياللى زى الحيطة 

شكراً ع القساوة والغباوة والكرم .. شكراً للى عجبه الدور وقرر يبقى محترم
شكراً يا ناكر خيرى .. شكراً لكل حاجة بتاعتى وسيبتها لغيرى
شكراً على الدلع تانى وشكراً ياللى فقسانى

شكراً كمان ع الوقت وشكراً عشان صدقت
و كفاية أقول شكراً.. شكراً .. لأنى سامحت